ក្រសួងពាណិជ្ជកម្ម សូមជូនដំណឹងដល់សាធារណជនមេត្តាជ្រាបថា ៖ ប្រព័ន្ធតម្កល់លិខិតជូនដំណឹងនៃប្រតិបត្តិការដែលមានកិច្ចធានា កំណែ ២.០ (Secured Transaction Filing Office - SETFO 2.0) ត្រូវបានដាក់ឱ្យដំណើរការជាផ្លូវការចាប់ពីពេលនេះតទៅក្រោយពីត្រូវបានចំណាយពេលកែសម្រួល និង រៀបចំនិម្មាបនកម្មថ្មី ឡើងវិញកន្លងមក។

ប្រព័ន្ធ SETFO គឺជាប្រព័ន្ធស្វ័យប្រវត្តិកម្ម សម្រាប់ផ្តល់សេវាសាធារណៈរបស់ក្រសួងពាណិជ្ជកម្ម ដែលត្រូវបានបង្កើតឡើង និង ដាក់ឱ្យដំណើរការតាំងពីឆ្នាំ ២០០៨ ដោយផ្អែកលើច្បាប់ស្តីពីប្រតិបត្តិការដែលមានកិច្ចធានា។ ប្រព័ន្ធនេះ គឺជាមធ្យោបាយដ៏ងាយស្រួលសម្រាប់គ្រឹះស្ថានធនាគារ ឬ មីក្រូហិរញ្ញវត្ថុ ក៏ដូចជាសាធារណជនទូទៅ ក្នុងការតម្កល់ ក៏ដូចជាស្វែងរកកំណត់ត្រា និង ព័ត៌មានពាក់ព័ន្ធនឹងលិខិតជូនដំណឹង សម្រាប់ជាមូលដ្ឋានក្នុងការសម្រេចចិត្ត និង កាត់បន្ថយហានិភ័យ និង ព្យសនកម្មនានា មុននឹងផ្តល់ឥណទានចំពោះកូនបំណុល ដែលប្រើប្រាស់ទ្រព្យធានាជាចលនវត្ថុ។

កាលពីដើមឆ្នាំ ២០២៥ ក្រុមការងារក្រសួងពាណិជ្ជកម្ម និង មជ្ឈមណ្ឌលបណ្តុះធុរកិច្ចថ្មី “តេជោ” នៃក្រសួងសេដ្ឋកិច្ច និង ហិរញ្ញវត្ថុ បានសហការរៀបចំនិម្មាបនកម្មប្រព័ន្ធសារជាថ្មី ក្នុងគោល-បំណងធ្វើទំនើបកម្មប្រព័ន្ធ សំដៅផ្តល់យន្តការទំនើប ងាយស្រួល មានប្រសិទ្ធភាព និង តម្លាភាព ក្នុងការតម្កល់លិខិតជូនដំណឹង។ ប្រព័ន្ធ SETFO កំណែ ២.០ នៅរក្សាទុកមុខងារ ដែលមានពីមុនដដែល គ្រាន់តែបានធ្វើទំនើបកម្មមុខងារទាំងនោះ ដើម្បីផ្តល់ភាពងាយស្រួលដល់អ្នកប្រើប្រាស់។ ទន្ទឹមនេះ, ប្រព័ន្ធថ្មីនេះក៏ត្រូវបានបន្ថែមមុខងារថ្មីមួយចំនួន ផងដែរ រួមមាន៖ (១)- មុខងារសុវត្ថិភាពបច្ចេកវិទ្យា ដែលផ្តល់ភាពងាយស្រួលក្នុងការប្រើប្រាស់ប្រព័ន្ធ, (២)- មុខងារចុះឈ្មោះ និង​ ចូលប្រើប្រាស់ប្រព័ន្ធ តាមរយៈកម្មវិធីទូរស័ព្ទដៃ CamDigiKey, (៣)- មុខងារបង់ប្រាក់តាមអនឡាញទាំងស្រុង, (៤)- មុខងារស្នើសុំ និង ទាញយករបាយការណ៍ស្រាវជ្រាវដែលមានការបញ្ជាក់ត្រឹមត្រូវតាមអនឡាញ, (៥)- មុខងារទាញយករបាយការណ៍ស្រាវជ្រាវដែលមានការបញ្ជាក់ និង ផ្ទៀងផ្តាត់ តាមថ្នាល verify.gov.kh, និង (៦)- មុខងារពង្រឹងសុក្រឹតភាពលើលិខិតជូនដំណឹងដោយការប្រើប្រាស់បច្ចេកវិទ្យាប្លុកឆេន (Cambodia Digital Ledger – CamDL)។

អាស្រ័យហេតុនេះ សម្រាប់ព័ត៌មានពាក់ព័ន្ធនឹងនីតិវិធីប្រើប្រាស់ផ្សេងៗ នៃប្រព័ន្ធ SETFO, សូមទាក់ទងមកកាន់ក្រុមការងារការិយាល័យតម្កល់លិខិតជូនដំណឹងនៃប្រតិបត្តិការដែលមានកិច្ចធានានៃក្រសួងពាណិជ្ជកម្ម តាមរយៈគេហទំព័រ៖ www.setfo.moc.gov.kh / www.setfo.gov.kh, ទូរស័ព្ទលេខ៖ 089 510 600 ឬ Hotline: 1266 ឬ អ៊ីម៉ែល៖ setfo@moc.gov.kh។